من أجلك حافظي علي نفسك

_طب اثبتيلي إنك بتحبيني وبتثقي فيا اثبتيلي يلا

_طيب هبعتها بس هتمسحها ومش هتحفظها عندك

_حاضر متخافيش يلا

افتكرت لما قالي نتكلم فيديو كول وأنا رفضت واتهمني بردو بـِ عدم الثقة والحب لحد ما وفقت وبقينا نقضيها رغي طول الليل، ياترى كل دا كدبة!

فتحت فوني وأنا بعيط إن أخر أمل عندي في حل مشكلتي ضاع وجنبها قلبي إللِ مش مبطل وجع وحاسة إنه بيتشق لما هونت عليه وحسيت إن زعلي ومشكلتي مش فارقين معاه، اتصلت بصاحبتي واتكلمنا وأنا بعيط

_ألو يا نهى

_اي يابت بتعيطي ليه

_محمد يا نهى رفض إنه يتدخل لا وكمان بيقولي هي فين المشكلة أنا مش شايفها

_منا ياما قولتلك يا أميرة دا مش بيحبك وواضح أوي إنه بيتسلى بيكِ مسمعتيش كلامي وقولتي بيحبني اتفضلي ياستي سابك في أول محطة وفلت إيده

_نهى ارجوكي قوليلي أعمل اي أنا مرعوبة

_اهدي بس وبطلي عياط علشان نعرف نفكر

_يارب سامحني يارب على كل إللِ عملته يارب، يارب كون معايا يارب وأوعدك مش هعصيك تاني

_اهدي يا حبيبتي هتتحل إن شآء الله

قفلت معاها بس الدنيا بتلف بيا... إزاي يبقى إللِ أنا بعمله هو إللِ غلط ودلوقتي بتعاقب عنه! إزاي... إزاي صوري إللِ بنشرها دي تكون سبب في أذيتي بالشكل دا أومال ليه أصحابي بيمدحو في إللِ بعمله وفرحانين إنهم بيشوفوني!... ليه إللِ حبيته اتخلى عني بالطريقة دي! أنا دا أكتر وقت محتجاله فيه وهو سابني وضرب بيا بـِ عرض الحائط... هو إللِ بيحب حد بيسيبه ولا أنا إللِ عامية! لـِ درجادي الحُب عمى قلبي وخلاني أشوفه مَلاك مبيغلطش وهو أصلًا أول واحد سهل ليا الغلط... اعمل اي ياربي أهلي لو عرفو هتبقى مصيبة بس لازم يعرفو أكيد ربنا هيعاقبني بإنهم يعرفو أكيد

شوية ولقيت صاحبتي بترن عليا تاني؛ فكلمتها

_ألو يا نهى

_أميرة فيه واحد مُبرمج أخو واحدة صاحبتي ممكن يساعدك

_مُبرمج يعني هكر بردو صح

_لا مُبرمج بيعرف يعمل كل حاجة ودي دراسته بس بيشتغل في الخير ويساعد الناس مش أكتر أما الهكر دا للشر بس عفانا الله

_طب اعمل اي

_بصي أخته هتكلمه ونشوف

قفلت معايا على كدا وبعد ساعتين لقيتها مدخلاني في روم ماسنچر وكان فيه الشاب دا وأنا ونهى صاحبتي وصاحبتها إللِ هي أخت الشاب

سألني أسئلة كتير وخلاني اطلب أكواد كتيرة وأجبله اسكرين باللِ يطلع واكتشفت إنه قالي إني مش متهكرة وإنه الشاب بيهددني بـِ صور أنا كنت نشراها فعلًا وأخد مِني رقم الشاب إللِ هددني بالصور واكتشفت إنه هو نفسه إللِ كان مُرتبط بيا وكلمه وتوصل معاه إنه يمسح الصور بعد تهديدات ومحاولات كتيرة وقالي نصيحة جميلة أوي"حافظِ على نفسك علشان أنتِ جوهرة والجوهرة لازم تتصان، ولو مش هتصونِ نفسك يبقى متستنيش مِن حد يصونك، أنتِ أغلى مِن إن حد يفكر فيكِ بطريقة مش كويسة، أنتِ أغلى مِن إنك تخافِ على سُمعتك بالطريقة دي، المفروض تكوني مَلكة مُتوجة بـِ تاج العفة والتطهر."ومِن يومها بقيت اعمل بـِ نصيحته وبقيت دايمًا قبل ما أعمل أي حاجة يتردد كلامه في دماغي واشوف هل كلامه مُطابق للي هعمله ولا لا، بقيت التزم واقرب مِن أصحاب صالحة تسحبني معاها في طريق الجنة وبقيت أعمل جروبات دينية وبوعي فيها الناس وبنصحهم نفس النصيحة

 اللِ اتقالتلي يمكن دا يشفعلي عند ربناوساعتها عرفت أنا ليه كنت بعيدة عن ربنا لأن كل ما بعمل معاصي كل ما ببعد عنه ولما تركت المعاصي حُبي لـِ ربي ذاد وقُربي منه مبقاش مستحيل زي ما أنا كنت فاكرة وتذكرت مقولة"مَن ترك شيئًا لله عوضه الله بـِ أفضل مِنه"