ماء البحر

كل حاجة بينهم انتهت مابقاش فيه أمل للرجوع تاني دموعها نزلت بعد ما خلاص انفصلت وبقت مطلقة رسمي
جت والدتها من وراها وقالت مالك يا نادره
ادتها نادره الورقة اللي في إيدها وقريتها والدتها وغمضت عينها بحزن على بنتها واللي وصلتله لكن قالت بهمس لعله خير بإذن الله
طبطبت على كتف نادره وقالت مابقاش له لزوم تروحيله يا نادره يلا ادخلي كل حاجة انتهت خلاص وهو باع طالما مش واثق فيكي يبقى خلاص ماتزعليش راح لحاله
نادره بدموع معذور يا ماما إنه يفكر بطريقة صح بعد اللي شافه أكيد دا وقف عقله عن التبرير
والدتها لسه بعد دا كله بتدافعي عنه

نادره بحزن مش فكرة بدافع عنه بس مش عايزه أسوء الظن يا ماما ولا إني أكرهه الموضوع فعلا صعب وكمان أنا عارفه إن عمرو متسرع شوية في تفكيره
والدتها أهو راح لحاله يا بنتي وربنا يعوضك ادخلي يلا
نادره لأ يا ماما هروحله قبل ما يروح الشغل لازم أعرفه حاجة مهما كان جوزي وكان مهم في حياتي فلازم أوضحله حاجة عشان مايفضلش يدعي عليا أو يكرهني وأخته كمان زمانها عرفت فمش عايزه أفضل وحشة في نظرهم حتى لو انفصلنا وكل واحد راح في طريق مابحبش صورتي تبقى وحشة في نظر ناس كنت بحبهم وكانوا مهمين عندي
والدتها خلاص اعملي اللي يريحك
سابت الورقة في إيد والدتها ونزلت

تروح لطليقها
بعد فترة وصلت هناك كان هو لسه في الشقة مهموم خلص لبسه مابقاش مصدق إن خلاص انفصل عن مراته اللي كانت مخلية للبيت روح وكانت بتودعه قبل ما ينزل وتدعيله كل دا راح في لحظة
راح يفتح الباب عشان ينزل لشغله فلقاها قدامه عينها فيها حزن كبير وباين عليها التعب والعياط ابتسم لما شافها قدامه لكن رجع لطبيعته تاني لما افتكر اللي عملته وډمرت حياتهم فقال بجمود جاية ليه هنا يا نادره ورقتك أكيد وصلتلك مابقاش ما بينا حاجة ياريت ماتجيش هنا تاني
نادره وهى بتحاول تمسك دموعها وهي بتبص للبيت اللي كانت بتحس فيه بالدفا والحنان والحب رجعت بصتله تاني وقالت عايزه أقولك إزاي تفكر إني ممكن أعمل كدا فيكم وأنتم عيلتي إزاي فكرت إني ممكن آذيكم وإني ممكن أمشي في سكة مهلكة زي دي
إزاي عقلك صورلك إن نادره اللي بتصحيك كل يوم من يوم ما اتجوزنا لصلاة القيام وتقعد معك لحد صلاة الفجر
نصلي مع بعض وبعدها نقعد لحد الشروق نسبح ونقرأ قرآن
وبعدها أقوم أجهز الفطار لحد ما تلبس عشان شغلك وقبل ما تنزل نكون مصلين صلاة الضحى ولما بتكسل بشجعك تصليها وكمان بتصل عليك وقت آذان الظهر عشان لتكون بتآجل وبشجعك
ودايما بحفظ في كتاب الله وقبل ما نام بقولك سمعلي وأنا بشجعك إنك تقرأ بعد الفجر وقبل النوم إزاي بس عقلك قدر يخيلك إن ممكن حاجة بشعة زي دي بعد سنة جواز وعشرة قدرت تشك فيا لأ دا أنت كمان متأكد من كلامك إني عملت كدا وصدقت فيديو مافكرتش تشوف هو حقيقي ولا مزيف لو كنت شاكك فيا لكن أنت اتهامك ليا كان دليل إنك متأكد إني عملت كدا
والبيت بيني وبين بيت أختك مسافة عشر دقايق هل من يوم ما اتجوزتني لقيتني نزلت الصبح بدري زي ما باين في الفيديو كدا وأنا كل يوم بكون صاحية معك من قبل الفجر لحد الساعة تمانية ونص الصبح يعني بتكون الشمس طلعت من زمان حتى لو عندي ظروف بقعد بذكر الله وبقرأ قرآن من