شبح نادر

وروحت ومنمتش من كتر مانا بفكر هعمل ايه بكره

قررت مروحش الشغل واروح المستشفي وفعلا روحت وبصيت من بعيد ع الاستقبال لقيت ان موظف استقبال غير الي قابلتها امبارح قولت الحمدلله اقدر اسأل عليه كأني اعرفه

وفعلا روحت وقولت لموظف الاستقبال في مريض هنا ف حاله غيبوبه اسمه نادر دكتور نادر انا قريبته

قالي كويس الحقي مامته وباباه لسه داخلين حالا وقت الزياره بدأ من ربع ساعه الدور التاني غرفه A_5

روحت طلعت وبدأت امشي وخايفه حد يشوفني ووصلت الاوضه وبصيت من الازاز لقيت مامته وباباه وقاعدين وع وشهم حزن.. وانا ببص عليهم مكنش واضح اوي شكل الشاب..ومركزه بحاول اشوفو من الازاز

لقيت صوت رجل جايه ناحيه الممر ف الطرقه جريت استخبيت لقيت دكتور خبط ودخل جريت عند الباب كان مردود سمعته بيقولهم حالته ف تأخر مستمر وانهم للاسف مفيش امل وانهم بيفكرو يفصلو الاجهزة عنه !!.

طبعا مامته وباباه لقيته انهارو حتي مش كملو وقت الزياره وخرجو وع وشهم حزن وانكسار..

دي كانت فرصتي اني ادخله ووقت الزياره لسه شغال

دخلت لقيته هوا فعلا الشاب الي شوفته بس كانت ملامحه مريحه اوي حسيت كأني اعرفه من سنين

قعدت قولتله كلام كتير كأني ما صدقت شوفته كلام انا مش عارفه بقولو ليه حاجات عن احاسيسي وارهاقي وتعبي..

وبعدين سكت ولسه هقوله كلام كتير تاني.جت الممرضه وقالت لي الزياره خلصت وخرجتني بره..

روحت وانا دموعي ع خدي مش عارفه السبب وفضلت ماشيه ودموعي مبتتفارقنيش....

دخلت البيت ودخلت اوضتي من كتر التعب الي فيا نمت بهدومي

صحيت

وركبت الاتوبيس وروحت الشغل وانا روحي كلها مسحوبه ومتخبطه بعد ماتأكدت انه هوا وقاعده سرحانه...

لقيته واقف قدامي وبيقولي انزلي..هوا ايه دا نادر انزل تاني؟!!!ومش الاقيك لا لا مش نازله

قالي متخافيش مش همشي.

وفعلا نزلت

قالي انا بركب كل يوم الاتوبيس دا بروح منه الشغل.دكتور جديد وكدا بقا 

و اول ماربنا كرمني اشتريت عربيه وانا راجع من الشغل بالليل العربيه اتقلبت بيا..

عارفه انا لو عشت تاني هافضل اركب اتوبيس طول حياتي ههه

بسسسس انا خلاص هاموت وهايفصلو عني الاجهزه 

كان بيقول الكلام دا وعلى وشه حزن كبير

كنت لسه هسأله اشمعنا انا شوفتك كان اختفي 

قررت اني لازم اساعده..وروحت المستشفي..

روحت الاستقبال وطلبت الدكتور اللي مسئول عن حالته وقعدت معاه وحاولت اقنع فيه انه يديله فرصه وميفصلوش الاجهزه عنه انا متأكده انه هيرجع محتاج فرصه بس

طبعا الدكتور قالي متأكده ازاي ؟!انا معرفش اقولو ايه احكيله ويقول عليا مجنونه ولا اعمل ايه..